BR LA UNION – Ikonkonsidera ita ti Office of the Ombudsman iti posibilidad a panangisapubliko wenno livestreaming ti isay-sayangkat a ‘preliminary investigations’ iti opisina seknan iti flood control projects anomaly cases.
Segun kenni Ombudsman Jesus Crispin ‘Boying’ Remulla, madama nga ad-adalen na daytoy kasaruno iti tarigagay nga aramiden a silulukat wenno transparent ti opisina.
Kinunana a kitkitaen na dagiti wagas tapno ad-adda nga ‘accessible’ iti publiko ti proseso nga ar-aramiden ti Office of the Ombudsman.
Karaman ditoy ti panangipakita iti publiko dagiti resolusyon ken panagdengngeg ngem saan a karaman dagiti sensitibo nga isyu a mainaig iti karbengan dagiti menor de edad wenno ubbing.
Inwaragawag pay ni Ombudsman Remulla a saanen a kasapulan a maipabaklay iti fact-finding ti opisina ti rekomendasyon nga insubmitir ti Independent Commission for Infrastructure idi kalman.
Kinunana a kalpasan ti pannakaawat ti nadakamat a rekomendasyon ket dumalan daytoy iti ‘preliminary investigation’ babaen ti maysa a panel of prosecutors.
Maipalagip nga insubmitir ti Independent Commission for Infrastructure ti kaudian nga interim report na iti Office of the Ombudsman idi kalman mainaig iti imbestigasyon iti flood control projects anomaly.
Inrekomendar da a maipila ti kaso kontra kenda Sen. Joel Villanueva, Sen. Jinggoy Estrada, sigud a DPWH Usec. Roberto Bernardo, sigud a Congressman Zaldy Co, ken dadduma pay.
