Imbilin ti Office of the Ombudsman ti innem a bulan a preventive suspension ti lima nga engineer ti Department of Public Works and Highways (DPWH) Bulacan First District Engineering Office mainaig kadagiti maipagarup nga iregularidad iti ₱188 million flood control projects sadiay Baliuag, Bulacan.
Karaman kadagiti nasuspende ti agnagan nga Irene Ontingco, Kevin Geronimo, John Michael Ramos, Bernardo Villafuerte ken Michelle Cruz, a sumangsango iti kaso a grave misconduct, serious dishonesty ken gross neglect of duty.
Mainaig iti nasao nga alegasyon iti pannakaaramid ti reinforced concrete slope revetments sadiay Barangays Piel, San Roque ken Sulivan, no sadino a mapapati a pineke dagiti dokumento mainaig iti implementasion, inspeksion, panangawat ken panagbayad kadagiti proyekto.
Segun iti Ombudsman, kasapulan ti suspension tapno saan a maimpluensiaan ti imbestigasion ken maipreserba dagiti posible nga ebidensia.
Kabayatanna, karaman met iti reklamo nga administratibo ti sumagmamano a sigud nga opisial ti DPWH Bulacan a naibaluden mainaig iti malversation ken graft charges iti ₱92.8 million flood control project idiay Pandi, Bulacan.
Malaksid iti administrative charges, sumangsango pay ti kaso a kriminal dagiti respondents.
