BR LA UNION – Pinatawan ti korte idiay Vietnam ti dua a tawen a pannakaibalud ni Miss Grand International 2021 Nguyen Thuc Thuy Tien.
Adda pakainaigan ti kaso iti panangi-promote na iti produkto a Kera Supergreens Gummies a maipagarop a nabaknang ti fiber.
Ngem nadiskubre ti korte nga adda laeng ti 0.935 percent a fiber ti nasao a produkto a gummy candies a nalawag a panangallilaw kadagiti customers.
Imbaga pay ti korte idiay Hanoi a ti Kera Supergreens Gummies ket maysa a joint venture iti baetan da Ms Tien ken ti kumpanya nga impatakder iti dua a kakadwa na nga influencers, ket kukua ni Ms Tien ti 30% stake.
Iti panagimbestigar dagiti maseknan, natakwatan nga agus-usar ti gummy candies ti 30% sorbitol, maysa nga artificial sweetener nga adda epekto na iti digestive system.
Idi Disyembre 2024, in-promote ni Tien iti social media channel na iti gummy candy, a kunana ket addaan katukad a maysa a plato ti nateng wenno healthy candy.
Inaklon ti Vietnamese beauty queen nga inaramid na daytoy tapno makapastrek ti adu a kuwarta.
Immuna a naaresto ni Tien idi bulan ti Mayo gaputi kaso a fraud.
Kadwa na a mabalud dagiti kasosyo na ken social media influencers nga isuda Pham Quang Linh ken Hang Du Muc.
