Nangipaay ti palawag iti agdama a sekretario ti Department of Public Works Highways a ni Secretary Vince Dizon, maipanggep iti baro a ‘referral’ iti Office of the Ombudsman, partikular iti rason no apay ta ‘plunder case’ iti kayat na a maipila kontra iti sigud nga House Speaker Martin Romualdez.
Segun kenni DPWH Secretary Vince Dizon, mamatida a natibker a basaran dagiti dokumento nga insubmitir da iti Ombudsman tapno aksionan iti maikadua a ‘referral’ .
Karaman kadagiti mapapati nga addaan ti natibker a ‘merito’ ti rekomendasion ket iti kontrata manipud kadagiti proyekto a nakitaan ti anomalia, ken dagiti nasapataan a salaysay wenno ‘sworn statements’.
Adda ti Office of the Ombudsman iti responsibilidad no kasano nga agtultuloy iti nagtipon a referral ti ahensia ken ti Independent Commission for Infrastructure.
Agtultuloyda a makitinnulong iti Ombudsman para iti maisaysayangkat nga imbestigasion maipapan iti maanomalya a flood control projects.
Maibasar kadagiti naglabas a desision ti korte, manmano pay laeng iti nasentensiaan a nagbasol iti kaso a plunder.
Iti rekomendasion ti departamento ken ti komision, nairekomenda a makasuan ni sigud nga House Speaker Martin Romualdez ken sigud nga Ako Bicol Party-List Representative a Zaldy Co ti kaso a plunder, graft, ken direct bribery.
Inaklon ti sekretario a kaaduan kadagiti umili ket magagaran iti panangpasungbat kadagiti karaman iti isyu ti flood control, ngem kas maitunos iti direktiba ti Presidente, tarigagay da a natibker dagiti reklamo wenno kaso a maipila maibusor kadagiti korap ken karaman nga indibidual.
Kasaruno ditoy ket pinagyamanan ni Dizon iti panagpasensya ti publiko iti agtultuloy nga imbestigasion ken panangipila ti kaso.#
