Nainget a pinaglibakan ni sigud a Presidential Spokesperson Atty. Harry Roque dagiti agwarwaras a damag a naarestar isuna iti Schiphol Airport idiay Amsterdam, Netherlands.
Iti maysa nga statement, kenuna ni Roque nga awan ti kinapudnona iti report gapu ta nakagatang pay isuna ti ticket ken nakatuding nga agbiahe agturong idiay Austria.
“There is no truth to the rumors that I have been arrested. I have a scheduled flight to Vienna, Austria today, November 25.”
Nagbalin a topiko iti isyu kalpasan a rumuar iti report a maipagarup a naarestar ni Roque iti nadakamat nga eropuerto.
Gapu iti daytoy, mismo a ni Senate President Tito Sotto iti nagkiddaw ti palawag manipud ti Department of Foreign Affairs (DFA) maipaggep iti damag.
Segun ti ahenia, awan ti naawatda a kumpirmasion manipud kadagiti opisial ken embahada idiay Europa maipapan iti maipagarup a pannakaarestar ni Roque.
Iti laksid dagiti agwarwaras a report, tinakderan ni Roque a nawaya isuna ken saan nga agdandanag kadagiti plano ti gobierno ti Pilipinas.
Ngem iti dasig ti Malacañang, saan nga iti administrasion ti mangpapa-arestar kenni Roque no di ket ti korte, gapu iti nadagsen a kaso a sangsanguen ti abogado.#
