Mangnamnama ni Senate Blue Ribbon Committee Chairman Sen. Panfilo Lacson a maipasan ti Senado iti Independent People’s Commission bill inton sumaruno a lawas.
Iti nasao a singasing linteg ket makitkita a mangpapigsa iti Independent Commission for Infrastructure (ICI) a nabukel babaen ti maysa nga executive order tapno imbestigaran dagiti anomalya kadagiti public infrastructure project kadagiti napalabas a sangapulo a tawen.
Segun kenni Lacson, ammo ti Senado dagiti karit a naipasango iti nasao a komisyon sipud pay idi nabukel daytoy.
Iti agdama, awan iti nagkedked wenno nangkuestion a miembro ti Senado iti nasao a singasing gapo da supsuportaran daytoy.
Inpaganetget ti Senador a kasapolan a maipaayan iti ICI ti independensia ken immunity manipud iti aniaman nga impluwensiya ken political issue tapno makatrabaho daytoy a bukbukod na.
Mangnamnama iti Senador a sumurot met dagiti Kamara de Representantes kadagiti agbalin nga addang ti Senado ngem no saan ket umuna da nga ipasa iti House version.
Iti agdama, maysa kadagiti ad-adalen laengen ti nangato a komisyon ket iti panangited ti contempt powers kas kanayunan a pannakabalin a naipaay iti immunan a nabukel a komisyon nga ICI.
Kenuna ni Lacson, awan serbina iti subpoena powers ti ICI no awan iti karbengan da a mangipataw ti contempt iti siasinoman a maimbitaran da a resource person.
Inpaganetget ti Senador a masapol iti maysa nga independent body a agimbestiga, mangipila ti kaso, ken mangusig kadagiti natakaw a pondo ti pagilian manipud kadagiti pampubliko a proyekto.#
