Saan a maragsakan dagiti sumagmamano a progresibo a grupo iti resulta ti imbestigasion nga inaramid ti Independent Commission for Infrastructure maipapan iti isyu ti korapsion kadagiti flood control projects.
Kagiddan iti panagpatingga ti operasion ti nasao a komision, nakurangan dagiti grupo manipud kadagiti nadumaduma a sektor, iti tignay ti panangpasungbat kadagiti amin a karaman.
Segun kenni Teddy Casiño, Chairperson ti Bagong Alyansang Makabayan, kenunana a saanda a mapnek wenno ‘kontento’ iti imbestigasion ti Independent Commission for Infrastructure, Office of the Ombudsman, ken Senado mainaig kadagiti anomalous projects.
Gapuna, inbinglayna a kas panawagan tapno pagsungbaten dagiti karaman, nangipilada iti reklamo kontra kadagiti sumagmamano nga indibidual a maipagarup a nairaman iti isyu ti korapsion.
Partikular nga inreklamoda ni sigud nga Undersecretary Adrian Bersamin, ken sigud a Department of Education Usec. Trygve Olaivar.
Nupay naipila ti reklamo, inallukoyna latta iti public watchdog nga agaramid ti inisiatiba wenno addang tapno pasungbaten dagiti nairaman iti korapsion iti pagilian.
Segun kenni David San Juan ti Kilusang Bayan Kontra Kurakot, limitado laeng iti imbestigasyon ti Independent Commission for Infrastructure.
Impaganetgetna a saan a naan-anay a nailasin iti imbestigasion dagiti pudno a ‘mastermind’, ‘big fish’ ken nangato ti ranggona nga opisial, pakairamanan dagiti adda iti Palasio ti Malakanyang.
Kiniddawna a mausig ken mapauneg iti imbestigasion tapno masarakan ti akin-aramid wenno ‘mastermind’ ti korapsion a nangbalkot iti pagilian.
Iti laksid daytoy, impaima laengen ti grupo iti Office of the Ombudsman iti aramiden daytoy nga addang maipapan iti reklamo a naipila iti opisina.
Nupay kasta, agtalekda iti mandato ti Ombudsman nga aramiden ti trabaho ken iti responsibilidad nga agtignay.###
