Nanayunan ti dua a senador iti nagperma ti partial committee report iti Senate Blue Ribbon Committee (BRC) seknan ti imbestigasyon dagiti mapapati a maanomalya a flood control projects.
Pinasingkedan ni Senate President Pro Tempore Panfilo Lacson a karaman kadagiti nainayon a nagperma ket isuda Senate President Vicente Sotto III a kas ex-officio member ken ni BRC Vice Chair Erwin Tulfo. Dumanonen ti innem dagiti nagperma iti partial report – kasapulan pay ti tallo tapno maipilan sadiay plenaryo.
Immun-una a nagperma ken ni Senador Lacson, a chairman ti komite, kadwa da Senadora Risa Hontiveros, Bam Aquino, ken Kiko Pangilinan.
Dua pay a senador manipud mayorya ti nangipeksa ti kinasagana nga agperma bayat a dagiti dadduma a mamanday-linteg ket agdudua kasaruno a pakiusapan ida dagiti sigud a kakadwa iti Senado.
Kabayatanna, temporario met a sinuspindir ni Lacson ti sumaruno a panagdengngeg ti komite maipanggep paylaeng ti saan a makumpleto a perma ti report.
