Binabalaw ni Ret. Gen. Romeo Poquiz iti timing ti plano ti administrasyong Marcos a panangipangato ti sahod dagiti military ken uniformed personnel (MUP).
Ita a lawas, impadamag ti Malacañang nga inton 2026 ken kadagiti sumarsaruno pay a tallo a tawen ket ngumato ti agingga 15% iti sueldoda.
Kenuna ti retirado a heneral a kasapulan dagiti tropa ti gobierno iti nasao a pay raise, ngem no maited daytoy iti kangitingitan dagiti naibutaktak a korapsion ti gobierno ket maibilang daytoy kas loyalty-buying tactic wenno pananggaatang ti talek dagiti uniformed personnel.
Kenuna pay ti retirado nga opisyal ken sigud a heneral nga ammu dagiti soldado iti mapaspasamak.
Dagos met nga inlibak ti sigud nga heneral a paset isuna iti maysa a grupo a mangilunglungalong ti destabilisasyon kontra iti agdama nga administrasyon.
Maipalagip a nagtignay iti Department of National Defense a karbengan da iti panagngato ti sweldo dagiti soldado ken pulis, ken inpaganetget a saan a wagas iti pay raise tapno gatangen iti talek dagiti MUPs.
Nagsaruno met a nagyaman ti Philippine National Police (PNP) ken Armed Forces of the Philippines (AFP) iti nadakamat nga addang ti agdama nga administrasyon.#
