BR LA UNION – Banbantayan ti National Capital Region Police Office (NCRPO) dagiti lugar nga agserbi a venue dagiti protesta inton bigat, September 21, anibersaryo ti Martial Law declaration idi September 21, 1972 .
Kabilang ditoy iti sumagmamano a lugar idiay EDSA, Chino Roces Bridge (CRB) idiay Mendiola, JP Laurel Street, Ayala Bridge, TIP Manila, San Sebastian Church, University of the East, ken dadduma pay.
Idi Setyembre 18 ket nangisayangkat ti walkthrough ken ocular inspection ni NCRPO Officer-in-Charge Brig. Gen. Christopher Abrahano kadagiti kangrunaan a kalsada ken lugar idiay Manila a paset ti panagsagana.
Segun kenni Gen. Abrahano, nasken ti nasapa a panangtingiting kadagiti mabalin a ruta ken lugar para kadagiti aktibidad a kas iti demonstrasyon, protesta, ken martsa.
Impalagip pay ti heneral nga agtalinaed nga alerto dagiti pulis bayat ti panangbantayda kadagiti nadakamat a lugar ken tapno mataginayon ti kinatalged ken urnos ti publiko.
Impalagip na met kadagiti otoridad a respetuenda ti karbengan dagiti umili ken palubosanda a mangisayangkat iti natalna a panagtitipon tapno iyebkas ti sentimyento da.
