BR LA UNION – Inlawlawag ni National Capital Region Police Office (NCRPO) chief Major General Anthony Aberin nga awan ti naipaay nga special treatment iti INC rally nga uray maysa isuna a miyembro ti Iglesia Ni Cristo.
Nupay kasta, impaganetget na nga agtulnog latta iti Konstitusyon ken pagrebbengan dagiti otoridad.
Naklaat dagiti otoridad iti kellaat a panagu-ummong dagiti raliyista idiay EDSA idi parbangon kalman, Martes agsipudta awan ti naited a maitutop a permit iti naisayangkat a tignay-protesta.
Kas sungbat, immandar ti Department of the Interior and Local Government (DILG) iti Philippine National Police (PNP) nga itandudo ti maximum tolerance tapno masiguro nga agtalinaed a nakapya ken naannayas iti sitwasyon.
Kinumpirma met ti Quezon City Police District nga adda naaprubaran a permit iti rally ti INC idiay EDSA People Power Monument agingga alas-8:00 inton rabii, Hulyo 1.
Impaganetget ti DILG, nga irespeto ti gobyerno iti karbengan ti tunggal Pilipino iti nakapya a panagtitipon ken panangipeksa ti arungaing.
Kabayatanna, agtultuloy ti pannaki-koordinar ti Armed Forces of the Philippines (AFP) iti PNP tapno bantayan iti sitwasyon.
Nagpanawagan met ti AFP kadagiti organizer ti rally a siguradwen a saan a masinga iti publiko iti maisay-sayangkat a tignay protesta.
