Pinaglibakan ti National Capital Region Police Office (NCRPO) dagiti alegasyon a saan a naikkan ti access ti abogado, taraon ken dadduma pay a kangrunan a kasapulan dagiti indibidual a naaresto kadagiti kallabes a protesta
Iti statement nga nairuar, kinuna ti NCRPO nga awan ti asinoman nga idi kustodiyada ti napagkedkedan ti gundaway a makagun-od iti legal a tulong wenno maipaayan iti taraon ken dadduma pay a kasapulan.
Impasigurado pay ti opisina a nabilin dagiti pulis a mangtungpal kadagiti naituding a proseso iti panangtenggel kadagiti naaresto, respetuenda ti karbengan dagitoy ken siguraduen a matratoda iti nasayaat.
kagiddan iti daytoy, inallukoy ti NCRPO nga ibasar kadagiti beripikado nga impormasyon ken opisyal a rekord dagiti reklamo kontra kadagiti pulis, imbes nga agpannuray laeng kadagiti saan a napaneknekan nga statements.
Impaganetget ti opisina ti pagrebbenganna a mangipatungpal iti patas a linteg bayat a sal-salakniban ti kinatalged ti publiko ken ti karbengan ti tunggal indibidual.
Segun iti NCRPO, aggiddan a responsibilidad ti pulisya ti panangtaginayon iti urnos ken panangsigurado a saan a masalungasing ti karbengan dagiti umili.











