Pinapigsa ken pinatibker ti Philippine National Police (PNP) iti panagbantay kadagiti presio dagiti tagilako kadagiti merkado tapno maliklikan dagiti pangta ti profiteering ken hoarding ita nga holiday season.
Segun kenni Acting PNP Chief Police Lieutenant General Jose Melencio Nartartez Junior, daytoy ket tapno masigurado a saan a maabuso dagiti karbengan dagiti consumers ken masalakniban met dagiti gumatgatang iti kangitingitan ti agtultuloy a panagngato ti presio dagiti tagilako a kas iti karne, nateng, ken dadduma pay sumagmamano a lawas sakbay iti bisperas ti Paskua.
Kasaruno ditoy ket dagus a nangituding ti kanayonan nga pulis iti PNP kadagiti merkado, supermarkets, wet markets, ken sumagmamano a merkado tapno dagus a masungbatan dagiti posibilidad ti pananggundaway dagiti aglaklako ken tapno malapdan ti hoarding ken panic-buying dagiti consumers.
Daytoy ket gapu iti nainget a koordinasionda iti Department of Trade and Industry (DTI) ken uray kadagiti Local Government Units (LGU) tapno mabantayan a naimbag iti panaggaraw dagiti presio ken ilegal nga aktibidad kabayatan iti daytoy a panawen.
Kabayatanna, impanamnama ti National Police iti publiko nga agtultuloy iti panangisayangkatda kadagiti sumagmamano nga addang ken intelligence driven operations tapno mailasin ken matiliw dagiti hoarders ken sindikato a mangpadpadas a mangmanipula kadagiti presio ti magagatang.#
