BR LA UNION – Agsag-sagana itan dagiti Beach Resorts and Hotel Restaurant, lodging house, ken dadduma pay nga accomodation establishments idiay Barangay Urbiztondo, San Juan, La Union, tapno papintasen ken pasayaaten dagiti pasilidad ken serbisyo para iti manamnama a panagdupodop dagiti turista iti sumarsaruno a bulan partikular iti holiday season.
Segun kenni Monaliza Leubben, Executive Vice President ti San Juan Beach Resort Association, makomikom itan dagiti empleyado ken mangmangged kadagiti nasao nga establisimeto a mangkita ken mangpapintas dagiti kuwarto, arwaten, ken uray iti panang-simpa dagiti CCTV tapno masiguro ti kinatalged ken panagbalin a komportable dagiti bisita.
Immunan nga inaklon ni Luebben a nakaru a naapektaran dagiti negosyo ken inladawanna pay a ‘to the lowest level’ sipud idi pandemic, iti kimmapsotan ti naduma-duma a negosyo idiay San Juan, a pakairamanan ti tourist arrival idi napalabas a bulan gaputi dakes a panawen a ginubway ti panagraira ti Southwest Monsoon wenno Habagat.
Ngem ita a simmayaaten ti panawen, agsubli manen ti regular a panagtrabaho dagiti empleyado kagiddan ti panagganaygay dagiti negosyo.
