BR LA UNION – Impangato ti Department of Agriculture (DA) ti maximum suggested retail price (MSRP) ti nalabaga a sibuyas.
Segun kenni Agriculture Secretary Francisco Tiu Laurel Jr., mangrugi ita nga aldaw ti Huwebes, Disyembre 11, rumbeng a suruten ti P150 a presyo ti nalabaga a sibuyas kada kilo.
Kinuna pay ti sekretaryo nga adda ti sumagmamano a negosyante a nangibaga a dagiti nalabbaga a sibuyas ket naggapu kadagiti lokal a mannalon tapno idepensa ti nangato a presyo ti sibuyas nupay ti kinapudno ket imported dagitoy.
Kinunana nga agang-angkat ti Pilipinas iti sibuyas manipud China ken India tunggal off-season.
Inlawlawagna nga agtalinaed ti presyo ti yellow ken white onions iti P120 kada kilo.
Mangnamnama ti opisyal a makitinnulong dagiti negosyante iti pannakaipatungpal ti MSRP, nangruna ita a Holiday season.
