Nangiruar ti baro nga analysis iti Global Advisory Committee on Vaccine Safety (GACVS) ti World Health Organization (WHO) a mangibagbaga nga awan ti ebidensia iti koneksion ti bakuna ken ti autism spectrum disorders (ASD).
Maibasar kadagiti 31 a panagadal manipud 2010 agingga 2025, pinasingkedan ti komite a natalged dagiti bakuna a maar-aramat manipud kinaubing ken panagsikog.
Napaneknekan nga awan ti koneksion iti ASD dagiti nasukimat a bakuna nga addaan ti thiomersal ken aluminum adjuvant.
Karaman kadagiti ebidensia ket iti nalawa a datos manipud idiay Denmark a mangsaklaw kadagiti ubbing a naipasngay manipud idi 1997 aginggana idi 2018.
Pinasingkedan pay ti Global Advisory Committee on Vaccine Safety dagiti immun-una a konklusion idi 2002, 2004, ken 2012 a dagiti bakuna ket saan a mangpataud ti autism.
Imbalakad ti WHO kadagiti pagilian nga ibasar kadagiti polisiya iti kabaruan a siensia tapno mapagtalinaed iti balligi a panagbakuna nga nakaispal iti mapattapatta a 154 million a biag iti napalabas a 50 a tawen.#
