BR LA UNION – Nagpanawagan ni Presidente Ferdinand R. Marcos Jr. nga ingetan ti seguridad ken panagbantay ita a panawen ti Paskua, gaputa umad-adu dagiti tattao kadagiti kalsada ken agdaldalyasat.
Segun iti Presidente, kasapulan ti nangatngato a tukad ti seguridad ken nalawag ken makapatalged ti kaadda ti presensiya dagiti otoridad kadagiti kalsada, public places, transport hubs, ken komunidad.
Impaganetget ni Presidente Marcos ti kinapateg ti pannakasigurado ti kinatalged ti tunggal umili tapno mariknada ti ragsak iti panawen ti Paskua nu mabuyogan ti talna ken panagkaykaysa.
Impalagip pay ti Presidente nga agtultuloy ti serbisyo publiko uray kabayatan ti selebrasyon ken inallokoyna dagiti empleyado ti gobyerno nga agserbi a buyogan ti dignidad ken ikonsiderar ti pagsayaatan ti pagilian.
