BR LA UNION – Inyanunsyo ni President Ferdinand R. Marcos Jr. a mabalinen ti ag-emergency loan iti Social Security System (SSS) dagiti kuwalipikado a miyembro, mangrugi ita a bulan ti Disyembre, ken addaan ti innem a bulan a moratorium.
Ti six-month moratorium iti loan amortization ket rumbeng a suruten ti SSS.
Kaipapanan a kalpasan a maawat ti kantidad iti emergency loan ket mapaway-wayan ti miyembro ti innem a bulan, sakbay a mangrugi nga agbayad.
Epektibo ti emergency loan agingga a nakapasidong ti pagilian iti state of national calamity.
Maipalagip nga idi Nobyembre ket indeklara ni President Marcos Jr. ti makatawen nga state of national calamity maiyannurot iti rekomendasyon ti National Disaster Risk Reduction and Management Council kalpasan ti nagsasaruno a panagduprak dagiti napipigsa a bagyo partikular ti Typhoon Tino idiay rehiyon ti Visayas.
Iti video message ni Presidente Marcos Jr. kinuna na a nababbaba ti maipataw nga interes iti emergency loan a 7 percent.
Iti sidong ti Emergency Loan program, dagiti SSS members manipud iti disaster areas ket makautang da ti agingga P20,000, laketdi nakatinnagen ti at least 36 contributions ken awan ti overdue iti SSS.
