Sangapulo ket innem a tattao iti natay bayat a 18 dagiti nasugatan iti nakaam-ames nga aksidente ti maysa a passenger bus idiay Indonesia, kalpasan a naidungpar iti concrete barrier iti Java Main Island, agsapa dikalman, Disiembre 22.
Maibasar iti report dagiti otoridad, agturong ti bus iti siudad ti Yogyakarta manipud iti kabesera ti Jakarta idi napasamak iti aksidente iti curved exit ti Krapyak toll road.
Segun ti inisial nga imbestigasion, simmobra ti kurba iti bus ken napartak iti panagtarayna, a nakaigapuan ti pannakapukaw ti kontrol iti driver ken dimmungpar iti concrete barrier.
Gapu iti kinapigsa ti impact, sumagmamano a pasahero iti naipurwak paruar iti lugan ken naipit iti uneg ti nadadael a bus.
Innem a pasahero iti naideklara a dead on the spot, bayat a sangapulo pay iti naiturong kadagiti dadduma nga ospital ngem idi agangay ket pimmusay gapu iti nakaro a pannakadangran.
Agtultuloy met a maag-agasan dagiti 18 a nadundunor, ket sumagmamano kadakuada ket adda iti kritikal a kondision.
Segun kenni Budiono, hepe ti search and rescue team, sumagmamano a minuto iti napalabas sakbay a simmangpet dagiti polis ken rescue personnel iti lugar.
Dagusda a nangisayangkat ti rescue operation ken nangted ti first aid kadagiti biktima, ngem awan ti naaramidanda kadagiti pasahero a natay iti nakapasamakan ti insidente.
Kabayatanna, agtultuloy iti panagpaimbag ti driver ti bus iti ospital. Inpakaammo dagiti otoridad a maipasidong isuna ti drug test ken naan-anay nga imbestigasion tapno maammuan no adda ti panaglabsing iti speed limit, kinaliway, wenno dadduma pay a banag a nakaigapuan ti aksidente.#
