Naleppasen ni ICI Commissioner Rosanna Fajardo ti trabaho a napagtalkan kenkuana iti imbestigasyon kadagiti maanomalya a proyekto nga im-imbestigaran ti gobierno.
Daitoy ti waragawag ni Presidential Communications Office (PCO) Secretary Dave Gomez iti panaglosolos ni Fajardo, nu sadinno ket imbatad na a naala iti opisyal para ti financial forensic.
Panggep daitoy a nainget nga adalen ti agos ti pondo tapno maamwan nu sadino iti pagturturongan ti pondo ti pagilian.
Ti kumpleto a resulta ti panagadal ni Fajardo ket agbalin a paset dagiti rekomendasyon nga isubmitir ti Independent Commission for Infrastructure idiay Office of the Ombudsman.
Maiwaras dagiti dokumento kadagiti maseknan nga ahensya ti gobierno a kas iti Commission on Audit (COA) tapno agtultuloy ti sumaruno nga addang ti proseso.
Inlawlawag ni Gomez a ti akem ni Fajardo manipud nangrugi agingga nagleppas ket nakapamaysa laeng iti mandato na.
Kabayatanna, mabukel metten ti pinal a report inton sumaruno a tawen ken maipasa daitoy sadiay Office of the Ombudsman para ti maiyanntop nga aksyon.
Nagyaman met ni Presidente Ferdinand Marcos Jr. kenni Commissioner Fajardo iti serbisyo na ken ti panangimaton na a napirmis ken mabanbantayan ti panangusar ti pondo ti pagilian.
Impunto ni Gomez a paset daitoy ti nalawlawa a tarigagay ti administrasyon nga aramiden nga umno, nalawag, ken nakapamaysa ti gobierno kadagiti umili a Pilipino.
