BR LA UNION – Mamati ni Batangas 1st District Rep. Leandro Leviste nga ad-adu wenno nalaw-lawa ti ammo ni sigud a Department of Public Works and Highways (DPWH) undersecretary Maria Catalina Cabral maipapan iti korapsiyon a mapaspasamak iti flood control project no idilig kadagiti dadduma nga opisyal ti ahensiya.
Karaman ditoy ni sigud a DPWH Undersecretary Roberto Bernardo ken dadduma pay a sigud nga opisyal ti nasao nga ahensiya a nagtestigo metten iti nagsina nga imbestigasyon kas kenni Engr. Henry Alcantara ken Engr. Bryce Hernandez.
Iti national level, kinunana a posible nga ad-adu ti ammo ni Cabral maipapan iti naibutaktak nga iskandalo, no ikumpara iti ammo ni sigud a DPWH Secretary Bonoan.
Inaramid ti kongresista ti statement, kalpasan ti immun-una a panang-admitirna nga iggemna ti adu a dokumento nga inted kenkuana ni Cabral, sumagmamano a bulanen ti napalabas.
Mamati ni Leviste nga adu koma ti maibaga ni Cabral iti agtultuloy nga imbestigasyon.
Kinunana a dagiti impa-ima a bulto a dokumento ni Cabral ket naglaon amin iti napapateg nga impormasyon.
Iggem daytoy ni Cabral, kunana, sakbay pay a naduktalan nga awanen ti kargana ti sumagmamano a napateg a computer ti DPWH idinto a saanen a mausar ti dadduma, kalpasan ti pannakaibutaktak ti iskandalo.
Agtalek ni Leviste a makaisayangkat ti Ombudsman ken ti Independent Commission for Infrastructure (ICI) iti case build-up maibasar iti linaon dagiti files nga iggemna.
