BR LA UNION – Agpapada a kinondenar dagiti mammanday linteg idiay Batangas iti alegasyon ti pada da a mammanday linteg a ni Batangas 1st District Representative Leandro Leviste kontra kada Executive Secretary Ralph Recto ken Governor Vilma Santos-Recto.
Maipalagip nga inakusaran ni Leviste iti agassawa ti maipagarop nga illegal campaign financing, bribery, ken dadduma pay.
Indatag dagiti Batangas lawmakers iti House Resolution No. 994 a naglaun iti panangkondinar da iti akusasyon ni Leviste, kagiddan ti panangipaganetget da a bin-ig nga awan basaran, saan a naingkalintegan, ken makadadael nga akusasyon.
Lima kadagiti innem a mangibagbagi ti Batangas iti nagpirma iti nasao a resolusyon, dagitoy ket isuda:
6th District – Rep. Ryan S. Recto
5th District – Rep. Beverly Rose A. Dimacuha
4th District – Rep. Amado Carlos A. Bolilia IV
3rd District – Rep. King George V. Collantes
2nd District – Rep. Gerville “Jinky Bitrics” A. Reyes-Luistro
Maipalagip nga imbaga ni Leviste a dadakkel a bulto ti kuwarta iti magasgastos idiay Batangas tunggal eleksiyon.
Inakusaran na pay iti amin a miyembro ti Kamara de Representantes nga aggat-gatang ti botos, banag a nainget a kinontra wenno pinaglibakan dagiti pada na a mammanday linteg, nga idi agangay ket imbabawi na met laeng iti kontrobersyal a waragawag ken inlawlawag na a saan amin, ngem ketdi sumagmamano a kongresista ti maipagarop a karaman iti vote buying.
