BR LA UNION – Mangisayangkat ti imbestigasyon iti Department of National Defense (DND) seknan iti napasamak a riribok iti baetan dagiti pulis ken grupo dagiti agtutubo, iti sumagmamano a paset ti Manila idi Domingo, Setyembre 21, kagiddan ti nalawa a rally kontra korapsyon.
Iti maysa nga interview, inwaragawag ni DND Secretary Gilberto Teodoro a duktalen ken kitaen ti departamento nu siasino wenno anya a grupo ti adda iti likod dagiti napasamak a riribok idiay Manila.
Inpaganetget na, dagiti mismo nga agtutubo a nakasuot ti nangisit a bado ken maskara iti nagdadael, nag-vandalize iti sumagmamano nga arwaten iti kalsada iti siyudad .
Napansin ti sekretaryo nga adda nairuar a maysa a saan nga ordinaryo a bandera a tampok iti maysa nga anime seknan ti maysa a grupo dagiti pirata.
Dakkel ti pammati ti sekretaryo a ti nasao a grupo ket addaan ti napigsa nga impluwensiya, a ti panggep da ket mangriribok ken dadaelen ti kinakapya ditoy pagilian.
Immunan a kinumpirma ti Philippine National Police (PNP) ken Department of Interior and Local Government (DILG) nga addan ti inisyal nga impormasyon da seknan iti pannaki-laok ti dadduma a lokal a terorista iti naisayangkat nga anti corruption rally idi Domingo, Setyembre 21, 2025.
