BR LA UNION – Kinumpirma ti Department of Justice a sumangsango ti baro a reklamo ni sigud nga Ako Bicol Partylist Rep. Zaldy Co mainaig kadagiti anomalya iti flood control projects.
Segun kenni Justice Spokesperson Atty. Polo Martinez, nangipila ti National Bureau of Investigation iti ‘plunder complaint’ kontra iti sigud a mammanday-linteg.
Kinunana a ti plunder complaint nga indatag ti National Bureau of Investigation kontra kenn Co ket naisina kadagiti pito a baro a reklamo a naidatag iti departamento.
Inlawlawag na pay a naisina daytoy kadagiti napalabas a 5 a kaso nga adda met laeng pakainaiganna iti anomalya dagiti flood control projects.
Dagiti innem a baro a flood control related cases ket proyekto a naipadamag a kompleto ngem awan ti nakita a nalpas wenno ‘non-existent’ idiay Bulacan.
Kayatna a sawen, lima a kaso ti naidatag idi napan a Disyembre idinto a dagiti innem a nadakamat ket baro a nainayon a naawat ti departamento.
Sabali pay ti naisina a ‘plunder complaint’ nga indatag ti National Bureau of Investigation kontra kenni Zaldy Co.
Impaganetgetna pay a saan a maitunos iti ‘timeline’ ti panangisayangkat dagiti ‘preliminary investigations’ kadagiti reklamo nga inpila ti ahensiya iti Department of Justice.
Kabilang dagiti ‘respondents’ iti nagsina a reklamo idiay Department of Justice ket isuda sigud a Sen. Bong Revilla ken agdama a Sen. Joel Villanueva.
Sumangsango dagitoy iti reklamo a Direct Bribery, Corruption of Public Officials, ken Malversation through Falsification a panaglabsing iti Republic Act 9184 ken 3019.
Ni Zaldy Co naipaayan ti pawayway nga agsumite ti kontra salaysay agingga Enero 15, agdama a tawen.
