Nangipakita ti kinalaing dagiti 48 nga agtutubo a surfer a buklen dagiti 24 a babbai ken 24 a lallaki manipud kadagiti nadumaduma a paset ti lubong iti maikadua nga aldaw ti high-level surfing competition ti World Surf League (WSL) – 2025 World Junior Championship a naangay idiay Urbiztondo, San Juan, La Union.
Napateg iti nasao a tornero para kadagiti agtutubo nga atleta nga addaan tarigagay a mabigbig iti sangalubongan nga entablado ti surfing.
Malaksida kadagiti ganggannaet, nakipaset met dagiti Filipino surfers ken maysa kadakuada ni Troy Espejon manipud Siargao.
Segun kenni Espejon, dakkel a pammadayaw para kenkuana iti agbalin a paset iti torneo gapu ta nabayagen nga arapaap na iti makisali ken ibagi iti pagilian kadagiti dadakkel a surfing events.
Maysa nga insipirasion kenkuana iti suporta ti pamilia ken komunidad ti surfing ditoy pagilian.
Paset iti nasao a kompetision iti kabsat ni Troy Espejon ken agpada a tarigagayda nga agballigi, saan laeng a para iti bukodda a bagi no di ket para iti Pilipinas, ken agserbi nga inspirasion para kadagiti dadduma pay nga agtutubo a surfers iti pagilian.
Pinagyamanan ni Espejon dagiti amin a sumupsuporta kenkuana, kangrunaan iti pamilia, gagayyem, ken dagiti Pilipino nga agtalek iti kabaelan dagiti local surfers.
Nangipeksa met isuna ti suporta para kadagit amin a Pilipino a paset ti kompetision.
Iti agdama, agtultuloy a mapadpadaanan dagiti sumarsaruno nga aldaw ti 2025 World Junior Championship kangrunaan iti naan-anay a panagbibinnalubal dagiti partisipantes tapno magun-od iti balligi para iti pagilian nga imbagida iti tay-ak ti international surfing.###
