BR LA UNION – Kinondinar ni Cotabato Governor Emmylou Taliño Mendoza iti napasamak a panagbettak ti granada idiay Barangay Dalapitan, Matalam, North Cotabato, pasado alas 12:00 ti tengngat rabii, Enero 1, 2026 a nakadunoran ti aganay 22 a tattao.
Dagus nga immandar ti gobernador kadagiti otoridad nga imbestigaran ti insidente ken arestaren dagiti attackers.
Maibasar iti report, naka-motorsiklo dagiti suspek a mapapati a nagpabettak ti granada ngem dagus a naglibas dagitoy.
Maipalagip nga idi napan a tawen, iti kangitingitan ti selebrasyon iti panangsarabo ti Baro a Tawen, maysa met laeng a grenade attack ti napasamak agarop alas 11:50 ti rabii idi Disyembre 31, 2024 iti carnival area idiay Sitio Condring, Barangay Marbel, Matalam a nakatayan ti maysa a tao ken nakadunoran ti 5 nga indibiduwal.
