BR LA UNION – Mailunglungalong ita idiay senado iti panangidaulo ni Senator Jinggoy Ejercito Estrada iti gakat a mangipalubos iti Bangko Sentral ng Pilipinas (BSP) a sukimaten ti bank deposits, a maatap nga adda pakainaiganna iti iligal nga aktibidad.
Kasaruno daytoy iti pannakaibutaktak dagiti mapaspasamak a kinakusit iti gobyerno.
Iti naidatag a Senate Bill No. 1047, nakapauneg iti tarigagay nga amyendaran ti Republic Act No. 1405 wenno Secrecy of Bank Deposits Law, tapno mapalubosan ti BSP, babaen ti tulong ti pagukuman, a sukimaten dagiti mapagdu-dua-an a bank account tapno kitaen nu adda iti naan-anay nga ebidensya iti panagpasoksok, panagsaur, money laundering ken dadduma pay a panaglabsing nga adda pakainaiganna iti kuwarta.
Nakailanad pay iti gakat nga anyaman nga imbestigasyon ket mabalin laeng nga isayangkat nu ada iti nalawag ken umdas a basaran ti seryoso nga iregularidad ken kasapolan nga aprubado ti Monetary Board ti BSP tapno masiguro ti umno a proseso ken maliklikan ti panagabuso.
Mailanad dagiti impormasyon a makalap manipud iti panagsukimat ken rumbeng nga usaren laeng para iti opisyal a tarigagay, kas ti panagimbestigar dagiti krimen pinansyal.
Tapno mamantinir ti proteksiyon ti kina-pribado dagiti depositor, mangikeddeng ti bill kadagiti nainget a salaknib, a pakairamanan ti panangiparit iti panang-eksamen dagiti bank account bayat ti eleksiyon, panangsalaknib kadagiti pondo a naideposito sakbay a naipatungpal ti linteg, ken panangiparit iti pannakaibutaktak ti resulta iti publiko, malaksid no kasapulan iti panangipila ti kaso a kriminal .
Sakopen pay ti nasao a gakat ti agpada a peso ken foreign currency deposits, a tarigagay nga i-balanse ti karbengan ti umili iti kinapribado ken ti kasapulan a mapapigsa ti kampanya kontra korapsiyon ken dadduma pay a krimen pinansiyal.
