BR LA UNION – Mapapati nga adda idiay Davao ni Senator Ronald “Bato” dela Rosa, segun kenni DILG Secretary Jonvic Remulla.
Daytoy ket iti tengnga ti saan a panagpakita iti publiko ni Dela Rosa ken saanna a panagdar-ay kadagiti sesyon ken panagdengngeg idiay Senado kasaruno dagiti report a maipagarop nga arrest warrant kontra kenkuana manipud International Criminal Court (ICC).
Ngem impaganetget ni Sec. Remulla a saan pay a naggaraw ti DILG agsipudta awan pay met ti naawat na a pormal a kopiya ti maipagarop nga arrest order manipud international tribunal.
Dinakamat ni Remulla a saan nga agaw-awid ti Senador iti balay na idiay Cavite ken imbaga na nga agkarruba da laeng, isunga pattienna nga adda idiay Davao ni Dela Rosa kadwa ti pamilyana.
Immunan nga imbaga ti abogado ni Dela Rosa a ni Atty. Israelito Torreon nga awan ti legal a basaran ti gobyerno tapno isuko ti siasinuman nga umili na iti ICC gapu iti kaawan ti allagaden tapno maipatungpal ti proseso, gaputa saanen a miyembro ti pagilian iti Rome Statute sipud idi napalabas nga administrasyon Duterte.
