BR LA UNION – Natay ti maysa a security guard iti napasamak a pammaltog idi Enero 17, 2026, agarup alas 12:30 ti tengngat aldaw iti Bypass Road, sangwanan ti maysa a cell site idiay Barangay Udiao, Rosario, La Union.
Nabigbig ti biktima a ni Jimmy Gonzales Jr., agtawen ti 43, guwardiya iti nadakamat a cell site, ken residente ti Barangay Las-ud, Caba, La Union.
Saan pay a nabigbig ti suspek iti nasao a pammaltog.
Maibasar iti inisyal nga imbestigasyon ti Rosario Municipal Police Station (MPS), kinuna ti maysa a testigo nga agtawen ti 55, maysa a mannalon ken residente ti nasao a lugar, nakangngeg ti tallo a nagsasaruno a putok ti paltog bayat ti kaaddana iti uneg ti balayda.
Maipagarop a rimmuar daytoy tapno amwen ti nagtaudan ti putok, ngem ti nakitana ket ti biktima a nakadasay, asideg ti gate ti cell site.
Dagus na nga in-report ti nasao nga insidente iti Rosario MPS.
Indeklara ti Municipal Health Officer ti Rosario-Rural Health Unit a ni Dr. Spencer Ortega, a dead on the spot iti biktima.
Nagsagaba ti sumagmamano a tama ti paltog, a mapapati a kalibre 45 a pistol, ti biktima a puon ti nakatayan daytoy.
Kabayatanna, maibasar met iti salaysay ti maysa pay a testigo nga agtawen ti 23, baro, ken residente ti Barangay Nangcamotian, Rosario a maipagarop nga adda iti asideg idi napasamak ti insidente agsipudta nakalugan ti motorsiklo.
Kinuna na a nangngegna ti putok ti paltog ken nakitana ti maysa a lalaki a suspek a napartak a pimmanaw kalpasan ti krimen.
Inladawanna ti suspek a nakasuot ti puraw a hoodie jacket, naglugan ti motorsiklo, nga addaan ti license plate a 534AQU, a makunkuna a kukua ti biktima, ken napartak a nagpa-abagatan.
Narekobre iti crime scene ti tallo nga empty cartridge cases ken maysa a na-deform a bala.
Intact dagiti personal nga arwaten ti biktima malaksid iti motorsiklo nga innala ti suspek kas getaway vehicle.
Iti agdama, agtultuloy ti imbestigasyon dagiti otoridad iti insidente tapno amwen ti pakabigbigan ti suspek ken ti pudno a motibo ti krimen.
