Sangsanguen ti Koreano singer ken aktor a ni Cha Eun-woo iti tax evasion case a dimmanon ti agarup 20 billion won wenno agarup P804 milion.
Im-imbestigaran isuna ti Seoul Regional Tax Office ken nakaawat ti kanayonan a tax assessments manipud ti National Tax Service (NTS).
Segun iti report, nangipasdek ni Eun-Woo ti family company babaen ti inana tapno mabingay iti matgedan ken mapabassit ti buis.
Nangiruar ti waragawag iti agency ni Eun-woo, iti Fantagio, a mangibagbaga nga agtultuloy a lawlawaganda iti isyu ken makitinnulong iti imbestigasion.
Impasiguradoda met a tungpalen ni Eun-woo dagiti legal nga obligasionna.
Gapu iti isyu, nagdesision dagiti sumagmamano a local brands nga inendorso ni Eun-woo nga ikkaten isuna iti kampanya.
Agdama nga agserserbi ni Eun-woo iti Army Band kas paset ti mandatory military service.###
