Nag-negatibo iti naisayangkat nga HIV test iti Russian vlogger nga inarestar ti Bureau of Immigration idi nabiit gapu ti pammutbutengna online a mangiwaras isuna ti sakit.
Maibasar iti impormasion ti ahensia, iti panangarestar ken dagus a panangipasidong ti ‘medikal nga eksaminasion’ ket naisayangkat babaen ti pannakitinnulong ti Department of Health.
Segun kenni Immigration Commissioner Joel Anthony Viado, dagus da a nakikoordinar kenni DOH Secretary Ted Herbosa ken nakumpirmar a ‘non-reactive’ iti nasao a sakit iti naaresto.
Idi laeng nabiit ket nagwaras iti maysa a video online a maipagarup a mangiwaras iti gangganaet ti sakit nga HIV bayat iti kaaddana ditoy pagilian, ngem maysa laeng daytoy a ‘rage-bait’.
Nupay kasta, impasigurado ti Bureau a saan nga ipalubos ken pagsungbaten dagiti gangganaet nga aglabsing iti linteg ken mangidiaya ti alarma iti publiko.###
