BR LA UNION – Inaresto ti National Bureau of Investigation (NBI) iti sigud a broadcaster ken television host a ni Jay Sonza ita a rabii ti Huwebes, Abril 30, iti mismo a balay na idiay Quezon City gaputi kaso a cyberlibel.
Kinumpirma ni NBI Director Melvin Matibag ti pannaka-aresto ni Sonza iti inwayat nga operasyon dagiti otoridad, maiyannurot iti warrant of arrest nga inyetnag ti Pasay City Regional Trial Court ita met laeng nga aldaw ti Huwebes.
Adda ita iti kustodiya ti NBI ni Sonza.
Kabayatanna, dagus nga imbaga ti abogado ni Sonza a ni Atty. Mark Tolentino nga agturong iti opisina ti NBI tapno siguradwen a maprotektaran iti karbengan ti kliyente na, a maysa itan a senior citizen.
Nagramot ti kaso iti reklamo nga indatag ti NBI idi Pebrero kontra kada Sonza ken vlogger a ni Jeffrey Luces Celiz, wenno mas am-ammo kas “Ka Eric Celiz,” gapu iti panangiwaras ti peke a medical records ni President Ferdinand Marcos Jr.
