Papigsaen ti Presidential Communications Office (PCO) ti kampaniana kontra kadagiti peke a damag babaen ti ad-adda a pannakitinnulong kadagiti tradisional a media, Malacañang Press Corps ken dadduma pay a sektor.
Segun kenni Presidential Communications Office secretary Lino Cayetano, mangbukel ti PCO iti sistema a mabalin a maberipika ken ipablaak dagiti media organizations dagiti impormasyon a napaneknekan nga ulbod.
Impaganetgetna a napateg a katinnulong ti media iti panangilasin kadagiti palso nga impormasion tapno mataginayon ti kredibilidad dagiti lehitimo nga organisasion ti damdamag.
Maipapan met ti saan nga umiso nga impormasyon mainaig iti Super El Niño, kinuna ni Cayetano a prioridad ti PCO ti pannakaiwaras ti umno ken beripikado nga impormasyon iti publiko.
Kinunana a maipaiman kadagiti maseknan nga ahensia, kas iti Department of Justice ken Department of Information and Communications Technology, dagiti posible a pagsungsungbatan mainaig iti disinformation.
Ti tarigagay ti addang ket tapno mapalawa ti pannangipadanon ti umno ken mapagtalkan nga impormasion iti publiko.
