Inaprobaran ni Presidente Ferdinand Marcos Jr. iti singasing ti Department of Transportation (DOTR) nga aramiden a lima a tawen iti validity ti registration dagiti baro a lugan.
Inwaragawag ni Palace Press Officer Atty. Claire Castro a nagdesision ti Presidente kalpasan iti pannakitaripnongna kadagiti miembro ti gabinete idiay Malacañang.
Maipaulog iti DOTR ti memorandum para iti pannakaipatungpal ti lima a tawen a validity iti pannakairehistro dagiti baro a lugan.
Natalantan met iti panagtaripnong dagiti reporma iti transportasion. Imbilin ti presidente nga ipangpangruna iti pagimbagan dagiti communiters. Panggepna a pagtalinaeden a nadalus ken naurnos dagiti pasilidad ken masigurado nga on-time nga agbiahe dagiti tren.
Segun kenni Castro, insingasing ni Transport Secretary Jaime J. Lopez a palawaen ti tallo agingga lima a tawen iti validity ti registration dagiti baro a lugan.
Dagus daytoy nga inaprobaran ti Presidente kalpasan a naipakita iti pagimbagan ti nasao nga addang.###
