BR LA UNION – Naisalbar dagiti otoridad ti maysa a mangngalap nga immuna a naipadamag a mapukpukaw kalpasan a nagturong iti baybay idiay Bangar, La Union idi agsapa ti Sabado, Pebrero 07, 2026.
Nabigbig ti mangngalap a ni Robert de Guzman, agtawen ti 35, residente ti Brgy. Mindoro, Bangar, La Union.
Nagtinnulong ti lokal a gobyerno ti Bangar babaen iti Municipal Disaster Risk Reduction and Management Office (MDRRMO) ken Philippine Coast Guard (PCG) Bangar Substation para iti panang-rescue ti nasao a mangngalap.
Segun kenni de Guzman maibasar iti report ti CSS-Bangar, agsubli koman idiay Barangay Mindoro manipud iti panagkalap na, idi maipaarop a nadadael ti port outrigger ti motor banca, isunga na-loose balance ken apagapaman a limned, manipud iti kaadayu a 4 nautical miles manipud iti igid ti baybay idiay Brgy. Darigayos, Luna wenno innem (6) a milya manipud iti shoreline idiay Paratong, Bangar, La Union.
Gaputi napaspas a koordinasyon ti Coast Guard Sub Station Bangar, MDRRMO Bangar ken dagiti lokal a mangngalap, dagus a nabukel ti Search and Rescue (SAR) Team ket ballaygi a naisalbar ni de Guzman.
Kalpasan ti nasurok maysa nga oras, nasarakan ti SAR team iti mangangalap nga adda iti nasayaat a kasasaad iti ayan ti bukod na a bangka.
Naiturong ti mangngalap iti Municipal Health Office para iti pannakataming na sakbay a nagawid iti pamilya na.
