BR LA UNION – Rinugyanen ti Intramuros Administration (IA) nga i-proseso ti termination iti kontrata ti JSL Security Agency, iti kumpanya nga akin-iggem ti dua a security guards a nag-viral bayat ti panang-bugbog da iti 17-anyos nga ubing a lalaki idiay Pasig River Esplanade idiay Intramuros, Manila, idi rabii ti Domingo, Pebrero 8.
Segun iti IA, ti addang ket kasaruno ti bilin ni Mayor Isko Moreno para iti full-scale investigation kadagiti akusado.
Ti live program iti social media, insango ni Mayor Isko ti dua nga akusado iti pamilya ti nabugbog a menor de edad.
Impaganetget ti mayor a dagiti private security personnel ket saan nga otorisado nga ag-patrol wenno mangipatungpal ti linteg iti kalsada wenno anyaman a pampubliko a lugar, a sakop ti Philippine National Police (PNP).
Iti inisyal nga imbestigasyon ti Manila Police District (MPD), nakasakay iti bisikleta ti biktima bayat nga adda iti esplanade, ngem nainget a maiparit ti panag-bisikleta iti nasao a lugar isunga sinita dagiti guwardiya.
Idi agkedked ti ubing nga agtulnog, timpuar ti nabara a sinnungbat iti baetan ti biktima ken dagiti security guards.
Kalpasan ti ababa a panagsasarita, tinagi-awan latta daytoy ti menor de edad isunga kinamat dagiti guwardiya ken nagsisinnungbat da manen.
Inatipa dagiti kameng ti Tourist Police and Intramuros PCP iti insidente ken inaresto iti dua a guwardiya.
Naiturong met idiay Metropolitan Medical Center Hospital ti biktima a nagsagaba ti pannakadangran iti ulo.
Ngem depensa ti dua a security guard, naaramid da ti nasao a banag gaputi rurod kalpasan a pinagsasawan isuda ti menor de edad.
Sumangsango ita dagiti dua a security guard ti kaso a physical abuse iti sidong ti R.A. 7610 wenno Special Protection of Children Against Abuse, Exploitation and Discrimination Act.
