BR LA UNION – Impasigurado ti House Committee on Justice a maipaayan iti fair hearing dagiti impeachment complaints kontra kenni VP Sara Duterte a kas iti panangtratar ti komite kadagiti impeachment complaints kontra kenni Presidente Ferdinand Marcos Jr.
Iti interview ti Bombo Radyo kenni Baguio City Rep. Mauricio Domogan nga agserserbi kas vice chair ti Justice Committee, inkari ti mammanday-linteg a lumasat met iti umno a proseso dagiti reklamo kontra kenni VP Sara, kas met laeng kadagiti proseso a dimmalanan iti dua a reklamo kontra kenni Presidente Marcos.
Kinunana nga usigen pay ti komite ti amin a linaun dagiti reklamo kontra kenni VP Sara, manipud iti grounds for impeachment, form, ken supporting evidence a mabalin nga idatag dagiti mammanday-linteg a nangisponsor kadagiti nadakamat a reklamo.
Iti agdama, tallo a complaint ti naidatag kontra kenni VP Sara.
Impaganetget ni Rep. Domogan a no makitaan iti naan-anay a porma ken substansiya dagiti reklamo, sigurado a maipatulod dagitoy iti plenaryo tapno madesisyunan.
Nupay kasta, kinunana a no makita met nga awan ti dagsenna, sigurado a maibasura dagiti reklamo, kas ti naaramid iti dua a reklamo nga immuna a naipila kontra kenni Presidente Marcos.
Segun iti House Justice Commmittee vice chair, mangnamnama dagiti supporters ti bise presidente ti open hearing ken scrutiny ti merito dagiti reklamo a sangsangwen ni VP Sara.
Kas met laeng idi napagsasaritaan dagiti reklamo kontra iti Presidente, kinunana nga amin a committee hearing ket maisapubliko babaen ti livestreaming ken media, nga awan ti mailemmeng.
