BR LA UNION – Pormal a nailukat idi kalman, Pebrero 25, 2026 iti West Philippine Sea Gallery Exhibit iti maysa a mall ditoy siyudad ti San Fernando, La Union.
Ti nasao a photo exhibit ket mailukat iti publiko agingga Pebrero 27, 2026 addaan ti tema nga “Our Seas, Our Rights, Our Future – Learn, Fight, Support.”
Segun kenni Lieutenant Colonel Jessie Barroga, Commanding Officer ti 24IB, 7ID, ti Philippine Army, kangrunaan a tarigagay ti gallery exhibit nga edukaran, ibinglay dagiti napapateg nga impormasyon iti publiko, ken mapalawa ti ammo maipapan iti karbengan ti Pilipinas idiay West Philippine Sea ken seguridad ti pagilian.
Inlawlawag ni Barroga a masapul a maikonsidera ti konteksto dagiti pasamak, pakairamanan iti karbengan ti Pilipinas iti sidong ti international law ken epekto daytoy iti masakbayan ti pagilian.
Tampok wenno makita iti nasao a gallery exhibit dagiti retrato, infographics, ken dokumento manipud kadagiti opisyal ken ahensiya ti gobierno.
Tampok pay dagiti visual presentations iti pakasaritaan ti maritime claims ti Pilipinas, mapa, ken dokumentasyon dagiti aktibidad idiay West Philippine Sea.
