Ibilang ti aktres a ni Nadia Montenegro a maysa a sagut ita a Women’s Month iti pannangabak na iti panangipila ti kaso kontra iti security staff ti senado.
Pinalubosan ti Pasay City Prosecutors’ Office iti panangipila ti kaso nga unjust vexation kontra iti security officer.
Mainaig ti nasao nga insidente idi 2025 no sadino a naakusaran iti aktres nga agus-usar ti illegal a droga bayat iti kaaddana iti uneg ti comfort room ti Senado.
Iti resolusion nga inruar ni Senior Assistant City Prosecutor Ju-Haree De Tolentino, inrekomendana iti pannakaipila ti unjust vexation case ken panaglabsing ti Republic Act 11313, wenno am-ammo kas Safe Spaces Act kontra iti Security officer ti Senado.
Maipalagip nga idi Agosto 12, 2025 ket sinita isuna ti security officer iti Hallway ti Senado kalpasan a nagusar isuna ti restroom ken dinamag no nagusar daytoy ti marijuana.
Impakita ti aktres iti linaon ti bagna ken ti vape tapno paneknekan nga awan ti kargana nga illegal a droga.
Ngem intuloy ti security officer a mangipila ti incident report ken idi agangay ket nag-leak ken naiwaras iti social media.
Gapu iti insidente, nagikkat iti aktres ti panagbalinna a maysa kadagiti staff ni Senador Robin Padilla.###
