BR LA UNION – Suportado dagiti eksperto iti salun-at iti panagusar ti publiko iti alternatibo a transportasyon kagiddan iti panagngato ti presyo ti langis gapu iti agtultuloy a riribok idiay Middle East.
Segun kenni Dr. Ricardo Francisco ti Philippine Society of Nephrology, maibilang daytoy a gundaway a maipaayan ti importansiya iti kinapateg ti panag-ehersisyo.
Imbes ngamin nga agusar ti lugan nu sumrek iti trabaho wenno iti asideg a pagturongan, nasay-sayaat a magna, a makatulong pay iti panangpa-sayaat ti salun-at.
Balakad ti nasao a doktor nga agusar ti bisikleta wenno magna nu asideg met laeng ti pagawidan tapno makasalimetmet iti panagkonsumo ti gasolina.
Iti insayangkat a presscon ti Philippine College of Endocrinology, Philippine Heart Association ken dadduma pay a grupo, ilunglungalong da dagiti addang tapnon maliklikan ti sobra a kinalukmeg.
Imbinglay ni Dr. Nemencio Nicodemus Jr., MD. ti Philippine College of Physicians a ti ‘obesity’, malaksid nga adu ti taba iti bagi ket posible a mangigubway pay ti komplikasyon iti salun-at.
Gaputi dayta, balakad dagiti eksperto a kumonsulta iti doktor tapno malapdan iti negatibo nga epekto gapwanan ti sobra a kinalukmeg.
