BR LA UNION – Nakapuy pay laeng ti piso kontra dolyar idi kalman, Miyerkoles, Marso 11, 2026, a ti balor ti maysa a US dollar ket P59.17.
Maibasar iti datos manipud Bangko Sentral ng Pilipinas, agtal-talinaed a nakapuy ti exchange rate ti piso kontra iti dadduma a foreign currencies:: P7.55 kada Hong Kong dollar, P46.44 kada Singapore dollar, P15.75 kada Saudi Riyal, ken P68.67 kada Euro.
Ti agtultuloy a panagkapuy ti piso ket mainaig iti nangato a presyo ti krudo iti sangalubongan a merkado gaputi tension idiay Middle East, kasta met ti panangmantener ti US Federal Reserve iti nangato nga interes, a mangpapigsa iti panagkasapulan iti dolyar.
Iti laksid ti bassit a panagbaba ti inflation ditoy Pilipinas manipud 4.1% idi Enero agingga iti 3.9% idi Pebrero, agtalinaed a nangato ti presyo ti taraon ken transportasyon, a mangapektar iti panagtalek ti merkado.
Gapu iti daytoy, nangin-ngina ti panagangkat kadagiti kangrunaan a tagilako ken manamnama nga ad-adda a ngumato ti presyo dagiti produkto iti lokal a merkado, idinto a dagiti pamilya nga umaw-awat ti remittances manipud iti ballasiw-taaw ket mabenipisyaran gaputa dakdakkel ti balor ti dolyar ken dadduma pay a foreign currencies no maipatulod ditoy pagilian.
Nupay kasta, siniguro ti BSP a bantayan da iti foreign exchange market ken nakasagana da a mangipatugpal iti addang tapno mamantinir ti natibker a piso ken suportaran dagiti sektor na apektado ti natamnay nga exchange rate.
