BR LA UNION – Sinertipikaran ni President Ferdinand Marcos Jr. kas urgent iti gakat a mang-amyendar iti Biofuels Act of 2006.
Iti surat nga impatulod ti Presidente kenni Senate President Vicente Sotto III a napetsaan ti March 16, kiniddaw na iti dagus a pannakaipasa ti Senate Bill No. 1965 a mang-amyendar iti Section 5 ti Republic Act 9367 wenno Biofuels Act of 2006.
Segun iti Presidente, ranta ti gakat a makissayan iti epekto ti panagngato ti presyo ti langis iti tengnga ti kumarkaru a geopolitical tensions ken volatility iti global oil markets.
Namnamaen a makatulong ti nasao nga addang tapno mapapigsa ti kabaelan ti pagilian a makagiddan ken makalisi iti posible a pannakasinga iti suplay ti enerhiya iti masangwanan.
Ti nasao a surat ket nai-copy furnished kenni House Speaker Bojie Dy III ken iti Presidential Legislative Liaison Office para iti maiyannatop nga addang.
Iti panagngato ti presyo ti langis iti sangalubongan a merkado ket addaan ti direkta nga epekto iti ekonomiya ti pagilian. Apektado iti transportasyon, produksyon ti taraon ken gastos ti tunggal pamilya a Pilipino.
Malaksid iti cash relief a maibuong kadagiti tricycle drivers, jeepney ken TNVS drivers, adda pay fuel subsidy para kadagiti mannalon ken mangngalap tapno agtalinaed nga agtul-tuloy iti produksyon ti taraon.
