BR LA UNION – Siniguro ni Agriculture Secretary Francisco Tiu Laurel Jr. nga agtaltalinaed a natibker iti suplay ti taraon ditoy pagilian laksid ti panagngato ti presyo dagiti produkto a petrolyo gapwanan ti kumarkaru a riribok idiay Middle East.
Segun iti Department of Agriculture (DA), awan ti panagkurang iti suplay ti taraon ken umdas ti imbentaryo agingga Hunyo wenno Hulyo ti agdama a tawen.
Kinuna ti sekretaryo nga agtultuloy ti panagapit ken adda umdas a reserba ti pagilian.
Partikular iti bagas, kalpasan nga impadamag ti National Food Authority (NFA) nga addaan daytoy ti nasurok-kumurang a 400,000 metric tons a buffer stock, nga umdas tapno mapakan iti intero a pagilian iti uneg ti 10 nga aldaw.
Malaksid dayta, namnamaen ti nangatngato a suplay gaputa manarimaan ti panagani ken panagserrek ti imported rice.
Nangipatungpal metten ti gobyerno kadagiti addang tapno mapagtalinaed ti kabaelan a presyo, kabilang ti mas nair-irut a monitoring, panangadal iti posible a price cap iti imported rice, ken panangidiaya ti mas nalaklaka nga alternatibo babaen ti Food Terminal Inc. ken Planters Products Inc..
Malaksid iti bagas, umdas pay kunana iti suplay a nat-nateng gaputa tiyempo ti panagapit ken panagmula.
Adda pay naan-anay nga imbentaryo ti imported a baboy bayat nga in-inut nga umad-adu iti lokal a produksyon.
Bayat nga iti mais, asukar, ken sibuyas ket impadamag ti DA chief nga in-season ti agdama.
Nupay kasta, aminado ti ahensiya a mabalin a maaddaan ti apagapaman a panagngato ti presyo gapu iti nangat-ngato a gastos iti transportasyon ken freight gapwanan ti global developments.
Kabayatanna, imbaga ni President Ferdinand Marcos Jr. nga agtultuloy agingga Hunyo 2028 iti programa a P20 kada kilo ti bagas para kadagiti benepisyaryo, tapno masiguro nga adda ti kabaelan a taraon para iti publiko.
