BR LA UNION – Kinumpirma ni Ukraine President Volodymyr Zelensky a nagsarita da kenni Pope Leo XIV idi Biyernes, Abril 3 kagiddan ti baro a serye ti panagatake ti Russia iti pagilian da laksid ti panawagan para iti Easter Ceasefire.
Iti maysa a post iti X, imbaga ni Zelensky a bayat a mapaspasamak ti panagsarita, binomba manen ti Russia iti Ukraine usar iti gasut a “shahed” drones ken dinosena a missile a timmama iti naduma-duma a komunidad.
Segun kenni Zelensky, tuluy-tuloy ti panagatake sipud idi rabii ti Huwebes ken umabot ti saan a bumaba iti lima a rehiyon iti napuntirya. Maipagarop nga awan ti uray maysa nga oras a kinakapya para kadagiti umili ti Ukraine.
Maibilang daytoy kas sungbat ti Russia iti singasing ti Ukraine para iti maysa nga Easter ceasefire, ngem imbes nga agsardeng ket lalo pay a kimmaru iti opensiba.
Iti panagsarita da Zelensky ken Sto Papa, tinalantan da iti agtultuloy a negosasyon, kabilang iti pannakitinnulong ti Estados Unidos.
Nagyaman met ti Ukraine iti tulong ti Vatican, nangruna iti panagsubli dagiti nadukot nga ubbing ken iti impaay a humanitarian aid, partikular iti napalabas a winter season.
Iti panagleppas ti panagsarita dagiti dua, nangidanon ti panang-kablaaw ti Ukrainian President iti Santo Papa ken iti amin nga agrambak ti Easter Sunday, kagiddan ti kiddaw a panangikararag para iti kinakapya.
Nangipeksa pay ti kinasagana iti Ukraine a mangawat iti Santo Papa ingkaso a bumisita idiay Ukraine.
