BR LA UNION – Indaulwan ni Presidente Ferdinand Marcos Jr., kadwana da Mayor Isko Moreno, Vice Mayor Chie Atienza, ken Teresita Sy-Coson, ti panagibunong iti 1,000 a sako ti libre a bagas iti sidong ti programa a “Biyayang Bigas para sa Maynila.”
Kabilang dagiti benepisyaryo ket dagiti mangmangged iti sektor ti retail, janitorial, security, maintenance, ken food service.
Paset iti nasao a programang iti inisyatiba ti administrasyon ni President Marcos tapno maipaayan ti dagus a tulong dagiti pamilya nga apektado iti panagngato ti presyo dagiti magat-gatang.
Mapatta-patta a nasurok 80,000 a pamilya a Manileño ti nag-benipisyar iti uneg ti innem a bulan, ket tunggal pamilya ket makaawat ti sag-10 kilo ti bagas.
Kagiddan daytoy iti panangsuporta kadagiti lokal a mannalon.
Ti nausar a pondo nga agbalor iti P286 milyon ket nagtaud iti Financial Assistance to Local Government Units ti Office of the President.
Kabayatanna, agaw-pansin pay iti panag-ehersisyo ni Presidente Ferdinand Marcos Jr. tapno ipakita nga awan kinapudno dagiti agwar-waras nga impormasyon seknan iti salun-at na.
Makita iti video nga arigna inaramid ti Presidente a dumbbell ti maysa a sako ti bagas, kas pammaneknek nga adda iti nasayaat a kondisyon ti salun-at ken pammagi na.
