REGION 1 – Agtultuloy iti panangtaginayon ti Land Transportation Office (LTO) Region I iti regulasion babaen ti panangisaysayangkat ti inspeksion kadagiti Private Emission Testing Centers (PETCs) iti naduma-duma a lugar iti rehion.
Daytoy nga inisyatiba ket maaramid tapno masigurado ti panangipatungpal kadagiti naited a pagalagadan, maprotektaran iti aglawlaw, ken masigurado nga kusto ken mapagtalkan iti emission testing dagiti lugan.
Agtultuloy iti panangsalimetmet ti ahensia kadagiti polisiya para iti nalinis nga angin ken panangpasigurado iti roadworthiness dagiti lugan.
Paset daytoy iti nalawlawa a kampanya ti nasional a gobyerno a mangsalaknib iti salun-at ti publiko ken mangpabassit iti epekto ti polusion manipud iti asok dagiti lugan.
Iti sidong ti panangidadaulo ni Department of Transportation (DOTr) Acting Secretary Atty. Giovanni Z. Lopez ken LTO Chief Assistant Secretary Markus V. Lacanilao, agtultuloy ti nainget a panang-monitor ken evaluation kadagiti accredited emission testing centers. Impaganetgetda iti kinapateg ti transparency, accountability, ken panangsurot kadagiti pagalagadan iti emission testing system.
Indauloanda LTO Region I Regional Director Glorioso Daniel Z. Martinez ken Assistant Regional Director Engr. Eric C. Suriben ti inspeksion idi Abril 15, 2026 iti CPL Emission Testing Center iti Cabaritan Sur, Naguilian, La Union, ken Pine Tree Emission Testing Center iti San Vicente, Agoo, La Union. Iti aktibidad ket naggapu iti panggep a masigurado ti panangsurot kadagiti operational guidelines, masukimat iti kasasaad dagiti equipment, ken masigurado iti de kalidad a serbisio a maited iti publiko.
Iti inspeksion, nainget a sinukimat dagiti empleyado ti LTO ti umno a calibration dagiti makina, kwalipikasion dagiti teknikal a trabahador, ken accuracy iti panagre-rekord ken panagipatulod dagiti resulta ti testing.
Nasukimat met iti aniaman nga iregularidad a mabalin a mangapektar iti kredibilidad ti emission testing, kas paset ti panangipatungpal ti zero-tolerance policy kontra panangallilaw.
Segun ti LTO, napateg iti papel dagiti PETC iti panangsalimetmet ti roadworthiness ken panangsurot kadagiti environmental standards. Babaen ti panangsigurado a dagiti laeng lugan a pumasa iti emission standards ti maitedan ti sertipikasion, makatulong dagitoy iti panangpabassit ti polusion iti angin ken panangitag-ay ti sustainable a transportasion iti rehion.
Inlawlawag ni Regional Director Martinez a dagiti kastoy nga inspeksion ket agtultuloy a maaramid a regular tapno mapagtalkan ti nangato a lebel ti serbisio. Impaganetget na pay ti agtultuloy a commitment ti LTO iti panangsalaknib iti pagimbagan ti publiko babaen ti panangsigurado a dagiti akreditado a pasilidad ket ag-operate a naannay, napateg ti integridad, ken adda accountability.
Babaen kadagitoy nga agtultuloy a addang, impaganetget ti LTO Region I iti dedikasionda iti panangipaay ti napateg ken responsable a serbisio-publiko, a mangsuporta iti mision ti gobierno a mangbukel iti nalinis, natalged, ken mapagtalkan nga aglawlaw para iti amin. (Report by Bombo Jordan)
Photo Courtesy: LTO Region 1 Drive Better to Enjoy Safe Travel
