Immapela ti liderato ti Department of Transportation kadagiti bus operators a lilikan paylaeng iti panagbiyahe ti bus idiay Bicol Region gapo iti atiddog a pila kadagiti stranded a lugan idiay Matnog Port.
Segun kenni Transportation Secretary Jaime Bautista, dumanon ti agarop 30-kilometro ti pila dagiti lugan idiay Matnog Port ti Sorsogon a na-stranded iti kangitingitan ti panagduprak ti bagyong Kristine.
Agtultuloy met a makikokoordinar ti DOTr kadagiti otoridad tapno mapalaka ti panagbiyahe dagiti RoRo vessels agturong idiay Allen, Northern Samar, aglalo ket manamnama pay nga umado dagiti pashero gapo iti umay nga Undas.
Mainaig iti daitoy, nangiruaren iti memorandum ti Land Transportation Office (LTO) kadagiti bus operators tapno saan paylaeng nga agbiyahe iti Bicol region, aglalo kadagiti agurong idiay Matnog Port gapo iti kaado unay dagiti lugan.
Para kadagiti agawid ti Visayas, mabalin da nga aglugan idiay Batangas Port agsipud addaan da ti biyahe diretso ti Mindoro ken Panay.
Mapatta-patta ti DOTr, a 100 a sangladan ti naapektaran ti bagyong Kristine ken dumanon met iti agarop P100-milyon ti nagbalin a perdisyon ti bagyo iti daitoy a sector ken kaadwan kadagitoy ket minor damages.
