Inlawlawag ti baro a panagadal iti pannakabukel ti Grand Canyon ken no katno a nagayos ti danom manipud ti Colorado River a nangpartuat ti maysa kadagiti kaunegan a rangkis iti lubong.
Babaen ti panagusar dagiti researchers ti babassit a zircon mineral a masarakan kadagiti sediment ken abo ti bulkan, natakuatanda iti posible a pakasaritaan ti karayan iti uneg ti minilyon a tawen.
Impakita pay ti panagadal a nasurok-kumurang 6.6 million a tawenen iti napalabas, nangrugi nga agayos ti karayan iti maysa a basin iti amianan-a-daya ti Arizona, a nangpartuat ti maysa a nalawa a danaw.
Iti panaglabas ti panawen, nagluppias iti danom ti danaw ken nangrugi a nagayos agturong kadagiti sumagmamano a lugar, a nagbalin a Grand Canyon, agarup 5.6 million a tawenen ti napalabas.
Agtultuloy a nagayos iti danom aginggana nakadanon iti Gulf of California, agarop 4.8 million a tawenen ti napalabas.
Segun kadagiti siyentipiko, ti sigud a danaw nga inawaganda a “Bidahochi Lake” ket naan-anayen a napukaw ken sigud a masarakan iti paset ti agdama a Navajo Nation.
Inlawlawag met dagiti eksperto nga iti Grand Canyon ket agtultuloy a maparpartuat aginggana iti agdama, gapu iti agtultuloy a panagreggaay ti bato ti Colorado River, a mapatta-patta nga umun-uneg ti ginasut a kadapan tunggal million a tawen.
Iti pakabuklan, impaganetget ti panagadal nga iti Grand Canyon ket produkto ti minilyon a tawen ti panagbalbaliw iti aglawlaw – a proseso nga agtultuloy a mapaspasamak aginggana iti agdama.###
