BR LA UNION – Tinakderan ni sigud nga House Speaker Martin Romualdez a saan na nga ipalubos nga agbalin nga scapegoat wenno fall guy tapno makalluban dagiti pudno nga adda iti likod ti kinakusit iti gobyerno.
Imballaag ni sigud nga House Speaker Martin Romualdez a saan nga agmaymaysa a bumagsak ken nakasagana a mangibutaktak ti amin nga ammo na iti agdama ken iti napalabas nga administrasyon nu ipilit nga aramiden isuna nga scapegoat iti isyu ti kinakusit iti gobyerno.
Dinakamat na pay ti maipagarop a panang-weaponize iti sumagmamano nga indibidwal, partikular kenni Zaldy Co, tapno maipakat ti interes ti sumagmamano a sektor kontra kenkuana.
Kinontra ti sigud a lider ti Kamara iti maipagarop a political demolition job nga addaan panggep a kalluban dagiti pudno nga adda iti likod ti panagtakawan iti pondo ti ili.
Segun kenni Romualdez, nagulimek isuna ti sumagmamano a bulan kas panang-respeto iti rule of law, ngem maipagarop a ginundawayan daytoy tapno agaramid ti fabricated narratives kontra kenkuana.
Direkta nga immapela ni Romualdez iti Office of the Ombudsman a tutukan dagiti dokumento ken ebidensya imbes nga agpatingga iti public pressure.
Kiddaw na nga idalan ti proseso iti umno ken liklikan iti theatrics ken shortcuts.
