BR LA UNION – Mangipatungpal dagiti kumpanya ti langis ti dakkel a rollback iti presyo ti diesel nga umabot iti P12.94 kada litro mangrugi ita nga aldaw ti Martes, Abril 28, 2026.
Segun kenni Energy Secretary Sharon Garin, ti baro a price adjustment ket epektibo manipud Abril 28 agingga Mayo 4, 2026.
Gaputi nasao a rollback, namnamaen a bumaba iti presyo ti diesel iti baetan ti P75.93 agingga P101.96 kada litro, depende iti lugar ken brand ti gasoline station.
Mas dakdakkel ti bumabaan iti presyo ti kerosene nga aganay P15.71 kada litro.
Nupay kasta, kabaligtad met iti agbalin a garaw ti gasolina, a maaddaan ti dagdag-presyo wenno panagngato ti presy daytoy.
Para iti Research Octane Number (RON) 97, ngumato daytoy ti P0.53 kada litro, isunga namnamaen nga umabot iti P79.79 agingga P104.93 kada litro iti retail price daytoy.
Segun iti Department of Energy, daytoyen ti maikatlo a nagsaruno a lawas a panagrollback iti diesel kalpasan ti panagbaliw iti sangalubongan a supply kasaruno ti katulagan a tigil-putukan iti baetan ti U.S.-Israel ken Iran.
Maipalagip a sipud idi Pebrero 28, nagsasaruno a price hike kadagiti produkto a petrolyo ti naipatungpal gaputi rinnupak idiay Middle East a nakaapekto iti sangalubongan a suplay ti langis.
